जम्मू खित्ते च प्रतिभा दी कोई कमीं नेई, जरूरत ऐ मंच प्रदान करने दी
जम्मू खित्ते गी मां सरस्वती दा आर्शीवाद प्राप्त ऐ की जे इस इलाके दे प्रतिभा कन्नै भरोचे दे कलाकार लगातार अपनी प्रतिभा गी सामनै आनै करदे न। ऐसा नेई ऐ जे नमीं पीढ़ी दे कलाकार गै डोगरी भाषा च गीत, भेंटां गाइयै अपनी प्रतिभा दा लोहा मना करदे न। इंदे थमां पैह्लें बजुर्ग पीढ़ी दे कलाकारें बी इस विधा च अपनी प्रतिभा दा लोहा मनोआया होग पर उसलै सोशल मीडिया नेई होने दे कारण मेरी पीढ़ी दे लोक उंदी गायकी थमां रूबरू नेई होई सके।
हां] अगर उसलै सोशल मीडिया होंदा तां अस बी उंदी गायकी थमां किश सिक्खी सकदे। नमीं पीढ़ी दे जम्मू खित्ते दे कलाकार सोशल मीडिया राएं अपनी प्रतिभा दा लगातार प्रदर्शन करा करदे न ते लोक उनेंगी पसंद बी करा करदे न। उंदे वीडियो लगातार सोशल मीडिया दे माध्यम कन्नै सामनै आवै करदे न। उंदे च सुभाष ब्राह्मणू] रूही-जुही] सरस भारती ते रिंकू मानसरिया होंदा नां चेचे तौर पर जिकरने जोग ऐ। सुभाष ब्राह्मणू होंदी गाई दी माता दी भेंट दा वीडियो पिछले दिनें गै सोशल मीडिया पर आया ऐ जिसदी सराह्ना बी मती होआ करदी ऐ।
Also Watch: Subash Brahmanu; Dogri Bhasha Ka Ek Sewak, Udhampur se
उआं गै रिंकू मानसरिया होंदा वीडियो बी पिछले दिनें लोकें दे सामनै आई चुकेआ ऐ। जिसगी लोकें बड्डे पैमाने पर पंसद बी कीता ऐ पर छड़े इनें प्रयासें कन्नै डोगरी भाषा दा प्रचार प्रसार नेई होना।
इस प्रचार प्रसार गित्तै मता किश करना पौना ऐ। ब्याह-कारजें जां दूए प्रोग्रामें च अजें बी नच्चना] गाना पंजाबी जां फी दूइएं भाषाएं दे गीतें पर गै होआ करदा ऐ। डोगरी गीत इनें ब्याह् कारजें जां दूए प्रोग्रामें थमां गायब लब्भदे न। क्या डोगरी च ऐसे गीत जां लोक गीत नेई लखोए जां रचे गे जेह्ड़े ब्याह् कारजें च लोकें गी नच्चने पर मजबूर करन। साढ़े किन्ने गायक ऐसे न जेह्ड़े दूए खित्तें च अपने गीतें राएं उस इलाकें दे लोकें गी नच्चने पर मजबूर करा करदे न। एह् जरूर सोच बचार करने आह्ली गल्ल ऐ।
तुस डोडा- भद्रवाह् दी नमीं पीढ़ी दी गै गल्ल लेई लैओ। इस इलाके दे किन्ने गायक ने जिनें कश्मीरी भाषा च गीत गाइयै कश्मीर घाटी च अपना नां उच्चा कीता ऐ ते उत्थें बी अपना इक खास मुकाम बनाई लैता ऐ। उआं गै पुंछ रजौरी दे गतार बी लगातार अपने प्रयास करा करदे न। पर छड़े प्रयासें कन्नै किश होना आह्ला नेई ऐ।
Also Watch: First Video Song of Rinku Manserwale being released on April 1
जम्मू च प्रतिभा दी कोई कमीं नेई ऐ। कमीं ऐ तां इक मंच दी। जित्थें कलाकार अपनी प्रतिभा दा प्रदर्शन करियै अपना नां देशै दे कन्नै-कन्नै पूरे संसार च चमकाई सकन। जम्मू च कलाकारें गी अपनी प्रतिभा गी नखारने गित्तै इक इंडरस्टी दी जरूरत ऐ। उत्थें गै सरकार ते लोकें थमां बी इयै मेद रक्खी जाई सकदी ऐ जे ओह् उंदी कला दी हौंसला अफजाई करन तां जे अस अपने कलाकारें गी उत्थें पजाचै] जित्थें सारी दुनिया च इंदी धुम्म पेई जा।
-सुरेन्द्र सागर
