आनलाइन धरना प्रदर्शन दा करी सकदे न इस्तेमाल
असें पिछले दिनें दिक्खेआ जे किश पार्टिएं दे लोक सिरें पर सलैंडर चुक्कियै प्रदर्शन करदे लब्भे; कारण हा रूट्टी पकाने आह्ली गैसे दियां कीमतां लगातार बधा करदियां हियां, उत्थें गै किश पार्टिएं दे लोक थालियां बजाइयै अपनियां राजनीतिक रूट्टियां सेकदे बी नजरी आए।
उआं किश महिला कारकुनें बी सड़कै च बेहियै ख्याली पला बनाए पर एह् पला बी छड़े ख्यालें तक्कर गै सीमित रेह् न, बने उब्बी नेई। पर पिछले किश समें थमां एह् लोक सड़कें थमां गायब लब्भा करदे न। इसदे पिच्छें इक्कै कारण लब्भा करदा ऐ, ओह् ऐ कोरोना महामारी दा त्राह्। इसदा त्राह् जनता जर्नादन की घट्ट र लीडरें च मता दिक्खेआ जा करदा ऐ। इस आस्तै सड़कें पर धरने प्रदर्शन बंद होई गे न।
सज्जनो ना ते सलैंडरें दियां कीमतां घट्ट होइयां न, ते ना गै दूइएं चीजें बस्तें दे भाएं पर कोई रोक नेई लग्गी ऐ। पर कोरोना दे डरै कारण लीडर अपने घरें थमां बाहर निकलने थमां डरा करदे न। छड़े इक्कै दिन सड़कें पर उतरियै सलैंडर दी कीमत घटट नेई होनी इस आस्तै मते बारी सड़के पर उतरना पौना ऐ।
भाई मन्नेआ जे कोरोना महामारी दा प्रकोप लगातार बधा करदा ऐ, पर अगर बाकी चीजां आनलाइन होई सकदियां न तां धरने प्रदर्शन की नेई आनलाइन होई सकदे न। सरकारी बैठकां आनलाइन होई सकदियां न। इंटरव्यू आनलाइन होई सकदे न, बच्चें दे मतेआन आनलाइन होई सकदे न, पढ़ाई आन लाइन होई सकदी ऐ तां फी सिआसी लोक धरने प्रदर्शन आनलाइन की नेई करी सकदे। उआं बी धरना प्रदर्शन आनलाइन चढ़ने पर गै जनता जर्नादन गी पता लगदा ऐ, फी की नेई लीडर आनलाइन धरना प्रदर्शन करी अपने मनै दी भड़ासा कडढै करदे न।
-सुरेन्द्र सागर
