बीजेपी दे त्रिुकटा नगर दे दफतरै बाह्र धरने पर बैठे दे बीएसएफ ते सीआईएसएफ च भरथी होने आह्ले नौजोआनें अपना त्रै म्हीनें पुराना धरना समाप्त करी दित्ता। कारण हा जे इस कोरोना महामारी दे दौरान धरने पर बैठे दे किश नौजोआन बमार होई गे।
Also Watch: Leaders ke jhuthe waade; BSF/CISF aspirants end protest
ते बाकी दे नौजोआनें सोचेआ जे नौकरी ते थ्होने नेई ऐ पर इस महामारी दे दौरान बमारी जरूर थ्होई जाग। इस आस्तै इस धरने गी समाप्त करना गै ठीक ऐ। पर जिसलै उनें अपने धरने गी समाप्त कीता उसलै सभनें नौजोआनें दिएं अक्खिएं च अत्थरूं जरूर ऐ हे। लगभग त्रौं म्हीनें तक्कर धरने पर बौह्ने दे बावजूद उंदे हत्थ खाल्ली गै रेह्। ग्राएं पिंडें कन्नै सरबंध रक्खने आह्ले इनें नौजोआनें बीजेपी गी पंचैत, बीडीसी ते डीडीसी चुनाएं च खुल्लियै वोट पाए ते नेताएं बी उंदे कन्नै बादे कीते जे चनाएं परैंत उंदे कन्नै इंसाफ कीता जाग। पर उंदे किन्ना इंसाफ होआ एह् उयै जानदे न जिनें इस धरने गी समाप्त करने दा फैसला लैता।
उआं किश नेताएं दा गलाना हा जे इनें नौजोआनें दी भाशा ठीक नेई ऐ। उनें नेताएं गी पता होना चाहिदा ऐ जे एह् नौजोआन ग्राएं पिंडें दे नौजोआन न, उंदी भाशा बड़ी खुल्ली भाशा ऐ। एह् नौजोआन दिलै थमां साफ न ते अपने दिलै दी गल्ल गै करदे न। पर नेताएं गी बी चाहिदा ऐ जे अगर ओह् जेह्ड़े बी वादे करदे न, उनेंगी पूरा करने दी कोशश करन। अगर ओह् अपने वादे पूरे करी गै नेई सकदे न तां उनें ऐसे वादे नेई करने चाहिदे जेह्ड़े ओह् पूरे नेई करी सकदे होन। पर जिसलै गल्ल बेरोजगार नौजोआनें दी औंदी ऐ तां उत्थें नेताएं गी समझी सोचियै उंदे कन्नै वादे करने चाहिदे। उआं बी वादे पूरे करने चाहिदे दे मुकरना नेई चाहिदा। अज्ज नौजोआन सरकारां बनाने ते सरकारें गी टाह्ने च खास भूमका नभांदे न। पर जिनें सरकारें जां नेताएं इस तबके कन्नै भेदभाव कीता, उनेंगी इस खामियाजा बी भुगतना पेआ ऐ।
इब्बी गल्ल ठीक ऐ जे बीजेपी दे नेता केंद्री गृह मंत्रालय च दखल नेई देई सकदे पर जम्मू कश्मीर पुलस जां दूए संगठनें च इनें नौजोआनें गित्तै किश करी सकदे न, जेह्ड़े बी नौजोआन इनें संगठनें दे म्यार पर फिट्ट बौंह्दे न उनेंगी नौकरी थ्होई सकदी ऐ। बच्चें गी नराज करना कोई शैल गल्ल नेई ऐ। मौजूदा सरकार थमां सभनें लोकें गी बड़ियां मतियां मेदां न की जे पुरानियां सरकारां लोकें दिएं आसें मेदें पर खरियां नेई उतरियां पर मौजूदा सरकार गी इस आस्तै जनता जनार्दन ने चुनेआ जे एह् सरकार नौजोआनें दिएं मेदें पर खरा उतरग।
Also Read: सोशल मीडिया बनेआ डोगरी कलाकारें दा साथी | डोगरी लेख
अगर सरकार नै गंभीरता कन्नै इस बक्खी ध्यान नेई दित्ता तां औने आह्ले चुनाएं च जनता जनार्दन उसगी बी जवाब देई सकदी ऐ। कांग्रेस नै बी अपने दौर च जनता जनार्दन ते नौजोआनें गी केईं सबज बाग ते सुक्खने दस्से पर उनेंगी पूरा नेई कीता जिसदा खामियाजा अज्ज कांगे्रस गी भुगतना पवा करदा ऐ ते उसदी गिनतरी हुन किन्नी ऐ, एह् सारे जानदे न। जनता कुर्सी पर ब्हाली बी सकदी ऐ ते इयै जनता कुर्सी थमां खल्ल बी त्रट्टी दिंदी ऐ की जे सत्ता कुसै दी जागीर नेई ऐ।
-सुरेन्द्र सागर
